List án landamæra 2008

List án landamæra er komin til að vera og verður haldin að ári. Nú er bara að bretta upp ermar og drífa sig í undirbúning.......... ja alla vega svona eftir sumarfríið.  

Allir sem hafa áhuga á þátttöku í hátíðinni á næsta ári geta sett sig í samband í síma eða með tölvupósti. 

Símanúmer: 691-8756, Netfang: [e-mail]

2007

Fjórðu hátíð Listar án landamæra er nú lokið. Hún stóð yfir frá 26. apríl til 16. maí.  27 atburðir fóru fram, flestir á höfuðborgarsvæðinu en einnig á Akureyri, Selfossi, Egilsstöðum og í Vestmannaeyjum. Þátttakendum og gestum fjölgar með hverju árinu og hátíðin verður sífellt viðameiri.Á dagskránni voru myndlistasýningar, bæði samsýningar og einkasýningar, tónleikar, leiklist, handverkssýningar, gjörningar, ljóðaflutningur og stuttmyndakeppni.  Þátttakendur voru frá 6 ára aldri og uppúr, einstaklingar með fötlun og án fötlunar.  

-Það er hægt að tala vel og lengi um alla atburðina þar sem margt skemmtilegt var á boðstólum. Þátttakendur eiga hrós skilið fyrir frábært starf, okkur skortir ekki hæfileikaríkt fólk á öllum sviðum lista. Ég ætla að stikla á stóru hvað varðar samstarfsverkefni og þau atriði sem boðið var uppá á landsbyggðinni. Einnig ætla ég að víkja aðeins að gjörningunum: Tökum höndum saman ,  sem framinn var við Reykjavíkurtjörn

- Samstarfs verkefni voru bæði fjölbreytt og skemmtilegt. Alls voru 24 samstarfsverkefni, sum þar sem ýmist var unnið saman í lengri eða skemmri tíma , önnur þar sem fatlaðir og ófatlaðir tróðu upp saman. Þar á meðal voru Ragnheiður Eiríksdóttir  (Heiða í Unun)  og Linda Rós Pálmadóttir söngkona frá Fjölmennt sem fluttu lög á setningarathöfn hátíðarinnar í Ráðhúsinu, við góðar undirtektir, enda miklar söngdívur þar á ferð. Blikandi stjörnur fengu KK til liðs við sig og fluttu þau  tvö lög saman  í Leiklistarveislu í Borgarleikhúsinu. Annað lagið var gullmolinn hans KK, ‘’When I think of angels...’’. Elísabet Yuka Takefusa söng það og má segja að ekki hafi verið bak án gæsahúðar eða hvarmur án társ á meðan á því stóð.

 -Í Norræna húsinu var haldin stór myndlistasýning þar sem sjö pör myndlistafólks, alls 17 sýnendur, unnu saman verk fyrir sýninguna og var útkoman vægast sagt frábær. Þar voru fatlaðir og ófatlaðir, þekktir og óþekktir myndlistamenn saman komnir. Þetta er ein af örfáum sýningum  sinnar tegundar en vonandi á þeim eftir að fjölga. Við eigum mikið af frábæru listafólki úr röðum fólks með fötlun, hverra verk eiga fullt erindi í almennt menningar umhverfi. 

 -Halaleikhópurinn og Þjóðarsálin komu fram í Borgarleikhúsinu og eru þeir dæmi um hópa þar sem samstarf fatlaðra og ófatlaðra er samfellt yfir árið. En til annarra samstarfsverkefna er blásið, sérstaklega í tilefni Listar án landamæra. Það er erfitt að gera öllum atburðunum skil án þess að fara í upptalningu, því fer ég ekki nánar út í samstarfsverkefnin en langar að nefna hversu frábærlega kynnar  stóðu sig á hátíðinni Þar má nefna  Unni Ösp og Ólaf Snævar í Ráðhúsinu, Björgvin Frans og Ásu Björk í Borgarleikhúsinu og Björgvin Frans og Steinunni Ásu á lokahátíðinni í Gullhömrum. 

-Það var sérstaklega gaman að sjá hvað hópar á landsbyggðinni eru kröftugir í sínu starfi. Á Selfossi söng Söngsveit Langjökuls, sem starfar hjá Fjölmennt, inn á geisladisk, lög Valgeirs Guðjónssonar. Valgeir lék með sveitinni á útgáfutónleikum á Selfossi þann 5. maí við góðar undirtektir.

- Mexikóskt þema var ráðandi á sýningu á Amtsbókasafninu á Akureyri.    Þar var afrakstur fjölbreytts og skemmtilegs myndlistarstarfs Fjölmenntar til sýnis.  Kjólar listakonunnar Fridu Khalo voru notaðir til innblásturs og einhverjir þeirra voru endurgerðir. Sannkölluð karnival stemming var ríkjandi.  Það var greinilega suður - amerísk stemmning á fleiri stöðum á landsbyggðinni. Á Egilsstöðum kenndu dansarar frá Costa Rica latínó dans við góðar undirtektir. Í gamla sláturhúsinu var leirlistasýningin Líf í Leir. Tónleikar voru í Egilsstaðakirkju þar sem flutt var verkið: Kvartett fyrir endalok tímans.  

-Í Vestamannaeyjum var framinn gjörningur undir yfirskriftinni ‘’ Allir eru einstakir’’. Hann fólst í því að búa til sameiginlegt tákn um mikilvægi okkar allra og að allir hafi áhrif hver á sinn máta. Stórt autt karton var rammað inn í Íþróttamiðstöðinni og síðan var öllum bæjarbúum boðið að koma og setja fingrafar sitt á plakatið í öllum regnbogans litum.  

-Annar gjörningur fyrir almenning var framinn við Reykjavíkurtjörn þann 28. apríl. Höfundur að þeim gjörningi er Kolbrún Dögg Kristjánsdóttir, fulltrúi Öryrkjabandalags Íslands í stjórn Listar án landamæra. Hann bar heitið ´´Tökum höndum saman’’. Þar var ekki ráðist á garðinn þar sem hann er lægstur heldur var miðað að því að fá almenning til að koma að  Reykjavíkurtjörn og mynda hring utan um hana sem tákn um samstöðu ólíkra einstaklinga og hópa. Fólk gæti þar sýnt samstöðu en jafnframt speglað sjálft sig í tjörninni, horfst í augu við sjálft sig og aðra. Frábær hugmynd, og þó að ekki hafi náðst að mynda hring mættu þar um 300 manns til þátttöku og skemmtu sér og nutu samveru og útivistar. Úti á Tjörninni voru tveir árabátar og í þeim listafólk, harmonikkuleikarar léku lög og ljóð voru flutt á táknmáli á meðan ræðararnir börðust við öldurnar.Það er stefnt að því að fremja slíkan gjörning aftur, og jafnvel aftur og aftur, eða þar til næst að mynda heilan hring um tjörnina. Kannski að hringurinn sé tákn fyrir þjóðfélagið, þegar hringnum er náð verði stóru skrefi til jafnréttis náð?   

-Í Norræna húsinu stóð Rannsóknarsetur í Fötlunarfræðum fyrir fyrirlestrarröð sem bar heitið Menning, listir, fötlun. Þar fluttu íslenskir og erlendir fræðimenn og rithöfundar bráðskemmtileg erindi. Einn af fyrirlesurunum var Ármann Jakobsson en hann ritaði jafnframt ávarp í dagskrárbækling hátíðarinnar undir yfirskriftinni: Óttinn við fötlun er fatlandi.  Mig langar að vitna í  ávarpið en þar segir Ármann:   “....... Kannski eru fatlaðir ekkert öðruvísi. Einn er heyrnarlaus en annar er skilningslaus og þann þriðja skortir ímyndunarafl. Hver er mesta fötlunin?”  

-Já þegar stórt er spurt......  

-Við erum öll gjörn á að flokka fólk í fyrirfram ákveðin hólf, hólf sem hamla sköpun og búa til sýnilega og ósýnilega þröskulda. Við viljum þröskuldana burt, og það hjálpar að fólk úr ólíkum hólfum komi saman, vinni saman og sýni saman. Samstarf fatlaðra og ófatlaðra er því mikilvægt á hátíð sem þessari, og einnig samstarf fólks með ólíkar fatlanir. Við viljum koma listafólki með fötlun á framfæri. Það er brýnt enda er mikið af ótrúlega hæfileikaríku fólki sem á fullt erindi út í hið almenna menningarumhverfi.Við viljum líka örva fólk úr röðum fatlaðra til þess að njóta menningar og sækja menningaratburði.  

-Menning er mannréttindi. Aðgengi að menningu er mikilvægt, byggjum huglægar skábrautir og P-merkjum  pláss í menningarumhverfinu. 

-List án landamæra er komin til að vera og verður haldin að ári. Nú er bara að bretta upp ermar og drífa sig í undirbúning, ja alla vega svona eftir sumarfríið.  

-Allir sem hafa áhuga á þátttöku í hátíðinni á næsta ári geta sett sig í samband í síma eða með tölupósti. 

 - Símanúmer: 691-8756, Netfang: [e-mail]
 

Bestu kveðjur, Margrét M. Norðdahl. 

 

Dagskrárbæklingur Listar án landamæra

Tengill á dagskrá Listar án landamæra 2007.

http://throskahjalp.disill.is/media/files/Bæklingur%20Listar%20án%20landamæra%202007.pdf

Verið velkomin

Verið hjartanlega velkomin á opnunarhátíð Listar án landamæra 2007 í Ráðhúsi Reykjavíkur. Opnunarhátíðin fer fram fimmtudaginn 26.apríl kl.17:00, á sama tíma opnar samsýning í Austursal Ráðhússins. 

Opnunarhátíð Listar án landamæra

   26. apríl                fimmtudagur  
Dagskrá í Ráðhúsi ReykjavíkurKl. 17:00 (5)
Kynnar eru Unnur Ösp Stefánsdóttir og Ólafur Snævar Aðalsteinsson Lilja Pétursdóttir leikur á píanó. -               Myndasýning á tjaldi, Ljósmyndir frá List án landamæra 2006.
Ágúst Guðmundsson forseti Bandalags íslenskra listamanna setur hátíðina               
Bjarney Erla Sigurðardóttir spilar á piano, Sofðu unga ástin mín, íslenkt þjóðlag               
Hörður Gunnarsson les frumsamin ljóð
Jón Ragnar Hjálmarsson flytur hip hop lag.   Lag eftir Ingva R. Ingvason og texti eftir  Jón Ragnar Hjálmarsson.              
Heiða Eiríksdóttir og Linda Rós Pálmadóttir flytja Kvæðið um fuglana og gamalt íslenskt þjóðlag.               
Elísabet Jökulsdóttir les ljóð             
Bjöllukórinn flytur lagið Kvölda tekur sest er sól
Opnunarhátíðin verður túlkuð á táknmáli. 

Samsýning í Austursal RáðhússinsKl. 17:00 (5) 
Fjölmargt ólíkt listafólk sýnir í Austursal Ráðhússins. Málverk, teikningar, textílverk og margt fleira.
Sýnendur eru: Ísak Óli, Gísli Steindór, Sigurður Þór, Guðrún Þorbjörg Guðmundsdóttir, Þórhallur Jónsson, Sveinbjörn Gestsson, Eyjólfur Kolbeins, Karl Kristján Davíðsson, Elísabet Yuka Takefusa, Auður Eggertsdóttir, Guðrún Hilmarsdóttir,   Kristín Þórðardóttir, Guðmunda Hjálmarsdóttir, Pétur Örn Leifsson, Ingunn Birta Hinriksdóttir, Ingi Hrafn Stefánsson, Hafdís Håkanson,  Kevin Buggle, Elín Dóra Elíasdóttir og Kristinn Þór Elíasson. Sýningin stendur til 6.maí. Þið getið kynnt ykkur dagskrána inni á www.listanlandamaera.blog.is og eins á síðum, Fjölmenntar, Þroskahjálpar, Átaks og Hins Hússins.  

Við hjá List án landamæra hvetjum ykkur til þess að mæta á atburði hátíðarinnar enda af nógu að taka. Sérstaklega hvetjum við ykkur til þess að kippa vinum og vandamönnum með að Reykjavíkurtjörn laugardaginn 28. apríl kl.13.00 og mynda þar hring samstöðu og einingar með okkur.  Þar verður framinn gjörningurinn, Tökum höndum saman, en markmiðið er að mynda óslitinn hring í kringum tjörnina en til þess þarf 1000 manns.

Með listakveðju, stjórn Listar án landamæra

Ítarleg dagskrá hátíðarinnar 2007

Hér eru tvær útgáfur af dagskránni

 - Löng og ítarleg

- Stutt og laggóð

 

Skrár tengdar þessari bloggfærslu:

• stytt dagskrá 2007
• Ítarleg dagskrá 2007

Nýjustu fréttir

Dagskráin fyrir hátíðina 2007 er nánast tilbúin og kemur hér á vefinn á næstu dögum.

Hér eru hins vegar upplýsingar um stóran gjörning sem verður þann 28.apríl við Reykjavíkurtjörn á vegum Listar án landamæra.

Tökum höndum saman, við þurfum á hvert öðru að halda Reykjavíkurtjörn 28. apríl 2007 kl. 13 til 15

 Gjörningurinn byggir á þátttöku þinni við að skapa líf og list án landamæra! 
 
 

Gjörningurinn fer fram á gangstéttum við tjörnina þar sem myndaður verður hringur með þátttöku þinni. Fólk safnast saman kl. 13 til að mynda hringinn. Leið-beinendur gjörnings verða staðsettir víðsvegar í hringnum og aðstoða. Gangan hefst kl. 14 og þátttakendur ganga saman hönd í hönd einn hring í kringum tjörnina. Allir eru velkomir að mæta og taka þátt.  Að taka höndum saman Hringurinn er eitt af grunn-formunum. Hann felur í sér hreyfingu. Við erum gjörn á að flokka fólk og setja það í mismunandi kassa. Að taka

Reykjavíkurtjörn og gönguleiðin, sem er 1 km  l

höndum saman og mynda hring óháð stétt og stöðu, augnlit eða útlitsgerð, krefst þess að við horfumst í augu við sjálf okkur. Sjóndeildar-hringurinn stækkar, við verðum ekki eins þröngsýn á lífið og færumst úr spori.  Tjörnin táknar það að við horfumst í augu við okkur sjálf, speglum okkur í vatninu, og horfumst í augun á náunganum, sem við höldumst í hendur við. Þessi gjörningur er góð leið til að efla vitundarvakningu, sem þarf að eiga sér stað til þess að allir geti verið sýnilegir og tekið þátt í þjóðfélaginu á sínum forsendum.

 

 

Við hvetjum fólk til að fjölmenna á Tjörnina og hjálpa okkur að taka höndum saman, allan hringinn.

Nánari upplýsingar um gjörninginn má fá á síðunni http://tokumhondumsaman.blog.is
 

Þátttakendur óskast

Sæl og bless öll.

Undirbúningur hátíðarinnar stendur nú sem hæst. Á dagskrá eru fjölmörg skemmtileg

og áhugaverð atriði. Meðal annars er leiklistarveisla í Borgarleikhúsinu, Stuttmyndakeppni, Geðveikt kaffihús, handverksmarkaður,myndlistasýningar í Norræna Húsinu, Hafnarborg, Mokka og í Ráðhúsinu. Tónleikar í Salnum, ljóðakvöld,Átakskvöld, dagskrá verður á Akureyri og Selfossi og jafnvel á Egilsstöðum. Margt fleira er einnig á dagskrá.

-

- Það er enn pláss í dagskránni fyrir sýnendur, bæði einstaklinga og hópa.

-

- Það er pláss fyrir eitt atriði í Borgarleikhúsinu

en þar sýna, Perlan, Þjóðarsálin, Halaleikhópurinn, Blikandi Stjörnur og Danshópur Hins Hússins

-

- Það er enn pláss fyrir sýnendur á samsýningu í Ráðhúsinu.

-

- Kjallari Hins Hússins er bókaður fyrir List án landamæra laugardaginn 5 maí og það er ekki komin nein dagskrá þar. Helgina á undan verður Geðveikt kaffihús. Áhugasamir með góða hugmynd mega gjarnan nýta sér plássið.

-

- Ljóðskáld óskast á ljóðakvöld.

-

- Handverkssýning og markaður verður laugardaginn 28.apríl í Hinu Húsinu. Bjarkarás og Skálatún munu sýna og selja þar muni en pláss er fyrir fleiri hópa og einstaklinga

-

Endilega hafið samband ef þið hafið áhuga á þátttöku.

Nýtt símanúmer Listar án landamæra er: 691-8756

Bestu kveðjur, Margrét M. Norðdahl

Nýtt símanúmer

Nýtt símanúmer Listar án landamæra er:

691-8756

LIST ÁN LANDAMÆRA 2007

Kæru vinir. Nú er hafinn undirbúningur fyrir List án landamæra 2007.

Við auglýsum eftir atriðum og þátttakendum.

Hafið samband í tölvupósti [e-mail]

Bestu kveðjur

List án landamæra 2006

 

- Listahátíðin List án landamæra var haldin í fyrsta sinn á Evrópuári fatlaðra 2003 og stóð þá yfir allt árið um
   kring.

- Hún var haldin aftur árið 2005 og stóð þá í rúma viku.

- Þetta árið stóð hún frá 25.apríl - 13.maí.

- Yfir 20 atburðir voru á dagskrá hátíðarinnar á höfuðborgarsvæðinu. Tónlist, myndlist, dans, leiklist og ljóðlist.

- Dagskrá var einnig á Egilsstöðum, Akureyri, Neskaupsstað, Ísafirði og á Selfossi

- Fjöldamargt frábært listafólk kom að hátíðinni og skemmtilegt samstarf var á milli margra hópa.

- Hátíðin verður haldin aftur að ári og því ekki seinna vænna að fara að skipuleggja atriði og atburði.

-

 

Hér til hliðar má skoða myndir frá hátíðinni,

-

 

það er hægt að kíkja á dagskrána og

-

 

lesa um atburðina.