OPNUN LISTAHÁTÍÐAR

Kæru vinir og velunnarar.

Verið hjartanlega velkomin á opnun listahátíðarinnar List án landamæra.

Þetta er sjötta hátíðin sem haldin er og hefst hún sumardaginn fyrsta,
fimmtudaginn 23. apríl, í Iðnó kl. 15. Þar stíga á stokk með söng og dans,
fatlað og ófatlað hæfileikaríkt listafólk og hefur þannig fjölbreytta hátíð
listviðburða sem stendur yfir fram í maí um allt land.

Jóhanna Sigurðardóttir, forsætisráðherra Íslands, mun setja hátíðina en það
eru þau Edda Björg Eyjólfsdóttir, leikkona, og Jón Þorri Jónsson sem kynna
dagskrána.

Tíska og tónlist eru þema fyrsta skemmtiatriðis dagsins, sem nefnist 90?s
Pop Golden Stars. Þetta er afturhvarf til tíunda áratugarins sem klúbbar
Hins hússins standa fyrir. Munu meðlimir tískuklúbbsins sýna tísku tíunda
áratugarins og dansa við tónlist sem tónlistarklúbburinn hefur samið.

Hjólastólasveitin verður svo með bráðfyndið uppistand.

Þá mun Valur ´´Geisli´´ Höskuldsson, ljóðskáld, lesa upp úr verkum sínum.

Rómantíkin tekur svo við er leikfélagið Zeus sýnir atriði úr splunkunýrri
uppfærslu á hinu klassíska verki Rómeó og Júlía í leikstjórn Ágústu
Skúladóttur.

Kór Orkuveitu Reykjavíkur og sönghópurinn Blikandi stjörnur ljúka
dagskránni með ljúfum tónum.

 Frítt er á alla viðburði hátíðarinnar en dagskrána má kynna sér nánar á
www.listanlandamaera.blog.is.

Bestu kveðjur,
Stjórn Listar án landamæra

 

SÁPUKÚLUR Á MOKKA

Mokka kaffi

Opnun klukkan 16:30 sumardaginn fyrsta, fimmtudaginn 23.apríl.

Sýning Ingvars Þórs Ásmundssonar og Bjargeyjar Ólafsdóttur á Mokka.

Ingvar Þór hefur mjög gaman af að taka myndir hvort sem er af ættingjum og vinum, heimilistækjum, bílum, götuljósum eða öðru sem hann sér í umhverfinu. Hann er mjög duglegur að prenta úr heimilisprentaranum og hefur fengið aðstoð við að safna myndunum saman í möppur. Hann átti nokkrar myndir sem voru á samsýningu Listar án landamæra í Ráðhúsinu sl. vor. og vöktu mikla athygli. Þar myndaði Ingvar Þór inn í þvottavél svo úr urðu mjög áhugaverðar myndir. 

Ingvar Þór vinnur að myndum sínum í frístundum, heima og heiman. Hann hefur farið á námskeið í ljósmyndun hjá Fjölmennt. Hann starfar í Gylfaflöt og vinnur þar ma.að ýmsum list- og nytjaverkum bæði í leir og mismunandi efni. 

Bjargey Ólafsdóttir er Myndlistarmaður sem sýnir nú ljósmyndir á Ljósmyndasafni Reykjavíkur og teikningar í Listasafni ASÍ.  Bjargey er kraftmikil listakona sem hefur vakið mikla athygli innanlands og utan. Nýlega var hún tilnefnd til hinna virtu Godowsky ljósmyndaverðlauna fyrir sýninguna TÍRU á Ljósmyndasafni Reykjavíkur. Framundan hjá henni er sýning og vinnustofudvöl í ISCP í New York.

Frekari upplýsingar um hana má finna á:

www.this.is/bjargey 

http://www.ljosmyndasafnreykjavikur.is/syningar-bjargey.htm

http://www.listasafnasi.is/

Bjargey og Ingvar Þór verða með samsýningu á ljós- og hreyfimyndum á Mokka sem teknar hafa verið í erli dagsins. 

Athafnir og upplifanir gripnar og festar á filmu, enda má sjá marga sameiginlega þræði í því hvernig þau vinna verk sín.