5.maí. Guðrún Bergsdóttir og Jón B.K. Ransú í Hafnarborg - Speglun í sal Íslenskrar grafíkur

 

 

 

 

 

Abstrakt - JBK Ransú og Guðrún Bergsdóttir

5. maí - 19. júní 2011

í Sverrissal Hafnarborgar

Opnun klukkan 16 (4) fimmtudaginn 5.maí 

Fimmtudaginn 5. maí kl. 16 verður opnuð forvitnileg sýning í Hafnarborg. Hér er á ferðinni stefnumót tveggja listamanna, með ólíkan bakgrunn og afar mismunandi vinnuaðferðir. Ransú er þekktur fyrir sterk abstrakt málverk en Guðrún saumar út undraverðar myndir þar sem flæða saman litir og form. Hlið við hlið á veggnum mætast verk þeirra í heimi lita og forma.

Guðrún Bergsdóttir stundaði nám við Öskjuhlíðarskóla og hefur sótt fjölda námskeiða í textíl og saumum hjá Fullorðinsfræðslu fatlaðra, nú Fjölmennt. Hún hefur haldið einkasýningar á verkum sínum, m.a. í Gerðubergi og á Mokka, og tekið þátt í samsýningum. Guðrún vinnur verk sín í útsaum sem tengist málverkinu sterkum böndum hún skapar myndverk sín jafnóðum á útsaumsfletinum á sama hátt og stærð strigans ákvarðar ytri mörk málverksins. Myndir hennar einkennast af sterkri hrynjandi lita og forma.

 JBK Ransu er menntaður í myndlist frá Akademie voor Beeldende Kunst í Enschede í Hollandi og National College of Art and Design í Dyflinni á Írlandi. Hann á að baki fjölda einkasýninga og samsýninga hérlendis og erlendis frá námslokum. Í list sinni hefur Ransu gagngert unnið með málverkið. Fyrst og fremst ákveðna þætti úr sögu málaralistarinnar en ekki síður með skynjun áhorfandans á samspili lita og forma.

Listamannsspjall Guðrún Bergsdóttir og Margrét M. Norðdahl Sunnudag 8. maí kl. 15 

Listamannsspjall JBK Ransú miðvikudag 1. júní kl. 20 

Hafnarborg er opin alla daga frá kl. 12 – 17 en á fimmtudögum er opið frá kl. 12 -21 á kvöldin.Lokað þriðjudaga. www.hafnarborg.is 

 

List án landamæra í sal Íslenskrar Grafíkur

  

Ísak Óli Sævarsson                   Hildur Ýr Viðarsdóttir                 Sigrún Huld Hrafnsdóttir

 

Félagið Íslensk grafík í samstarfi við List án landamæra stóð að þrykknámskeiði í einþrykki dagana 12. – 13. apríl á verkstæði félagsins í Hafnarhúsinu. Eitt af markmiðum Listar án landamæra er að koma list fólks með fötlun á framfæri og koma á samstarfi á milli fatlaðs og ófatlaðs listafólks. Nokkrir meðlimir félagsins önnuðust listsmiðjuna þær Irene Jensen, Elísabet Stefánsdóttir, Díana Hrafnsdóttir og Gunnhildur Þórðardóttir. Mikil stemmning myndaðist á námskeiðinu og er augljóst að þar eru mjög hæfileikaríkir einstaklingar á ferð. Þeir sem tóku þátt voru Hanna Lilja Bjarnadóttir, Kristján Kristjánsson, Hugrún Dögg Þorfinnsdóttir, Ísak Óli Sævarsson, Sigrún Huld Hrafnsdóttir og Hildur Ýr Viðarsdóttir. Öll voru þau að kynnast grafíktækni í fyrsta sinn þrátt fyrir að nokkur þeirra séu mjög virk í listsköpun. Afrakstur námskeiðsins verður hægt að nálgast á örsýningunni Speglun í sal félagsins dagana 5. – 8. maí og er opið kl. 14-17. Aðgangur ókeypis en sýningin opnar á fimmtudag kl. 18. 

 

Nánar um listamennina:

Ísak Óli er við nám í myndlistaskóla Reykjavíkur og sýnir verk sín í Hoffmannsgalleríi 6.maí. Hann hefur haldið fjölda sýninga og heldur úti heimasíðunni: www.isakoli.com. Sigrún Huld hefur einstakan myndheim og sýnir verk sín á Listahátíðinni List án landamæra 30.apríl á Mokka kaffi. Sigrún hefur haldið fjölmargar einkasýningar og tekið þátt í mörgum samsýningum. Hugrún Dögg er meðlimur í sönghópnum Blikandi stjörnum sem hefur hlotið margar viðurkenningar, innlendar og erlendar. Hugrún stundar einnig nám við Fjölmennt. Kristján Kristjánsson stundar nám við Fjölmennt í Reykjavík og reynir fyrir sér í listinni. Hildur Ýr er nemandi í Ármúlaskóla og stundar tónlistarnám. Hún er einnig fastur gestur í Hinu húsinu. Hanna Lilja Bjarnadóttir starfar hjá 365 prentmiðlum. Hún hefur lagt stund á myndlistarnám hjá Listasmiðju Lóu og tekið þátt í samsýningum.

 

Nánar um félagið Íslensk grafík á www.islenskgrafik.is og á facebook