Forsíða dagskrárbæklings 2010

List án landamæra auglýsir eftir myndverki á forsíðu dagskrárbæklings hátíðarinnar 2010. Bæklingurinn verður prentaður í um 5000 eintökum og sendur víða um land ásamt því sem myndverkið verður einskonar andlit hátíðarinnar 2010 og mun birtast hvar sem hægt er að koma því við, svosem á póstkortum, plakötum og öðru auglýsinga- og kynningarefni.

Senda má myndir í tölvupósti á netfangið [e-mail] með fyrirsögnina „Forsíða 2010“.

 

Hér getur að líta forsíður síðustu hátíða:

 

Forsíða 2009 - Einar Baldursson:

 

 

 

Forsíða 2008 - Kristo Leppäpohja:

 

Forsíða 2007 - Gígja Thoroddsen:

 

 

 

List án landamæra 2010 - Vilt þú vera með?

Nú er undirbúningur hafinn fyrir List án landamæra 2010.

Sem fyrr verður hátíðin haldin um land allt á tímabilinu frá seinni hluta aprílmánaðar og fram í miðjan maí. Nákvæm dagsetning opnunarhátíðar eða einstakra viðburða liggur ekki enn fyrir en mun ráðast á næstu dögum og vikum.

Ef þú hefur áhuga á þátttöku eða þekkir einhvern sem gæti haft áhuga þá máttu gjarnan setja þig í samband við okkur. Bæði er möguleiki að taka þátt í einhverjum af þeim viðburðum sem við verðum með á dagskrá eða koma með nýja viðburði inn í dagskrána.

Hátíðin er hugsuð sem samstarfsverkefni og því ræðst dagskráin af þátttakendum.

Hugmyndir að viðburðum eru: Opin hús, litlar og stórar myndlistarsýningar, tónleikar eða tónlistarflutningur, upplestur, þátttaka í samsýningum, leiklistarviðburðum og svo mætti áfram lengi telja. Við munum aðstoða eftir þörfum við skipulag og að finna aðstöðu fyrir viðburði.


List án landamæra
Sími: 691-8756
Netfang: [e-mail]
Netsíða: www.listanlandamaera.blog.is

UPPSELT Í BORGARLEIKHÚSIÐ

Kæru vinir.

 Uppselt er á sýningu Listar án landamæra í Borgarleikhúsinu.

 

Leikhúsveisla í Borgarleikhúsinu 28.09.09

List án landamæra mun blása til stórbrotinnar leikhúsveislu í Borgarleikhúsinu mánudaginn 28. September kl. 20.00, í kjölfarið á norrænu ráðstefnunni „Líf og list án landamæra“ sem List án landamæra stendur fyrir sama dag á Grand Hóteli.

 

Norski hópurinn Dissimilis mun flytja verkið Árstíðirnar fjórar á stóra sviðinu, en hópurinn kemur hingað til lands í boði Listar án landamæra og Norrænu ráðherranefndarinnar.

 

Dissimilis

Fyrir u.þ.b. 30 árum sat Kai Zahl, faðir þroskahefts ung manns, og átti erfitt með að sætta sig við að stærsti draumur sonar hans um að spila á hljóðfæri og spila í hljómsveit gæti ekki orðið að veruleika því að sonurinn gat ekki lesið nótur. Kai tók að hanna einfalt nótnakerfi með litum sem gerði syni hans kleift að læra að spila á hljóðfæri og 1981 var fyrsta hljómsveit hans stofnuð. Þetta var upphafið að Dissimilis.
Næstu árin fóru fleiri að  æfa með Dissimilis og árið 1987 skrifaði Kai Zahl söngleik fyrir hópinn. Fyrsta sýning þeirra var sýnd fyrir fullu húsi í Hljómleikahöllinni í Osló. Þetta var í fyrsta skipti sem eingöngu einstaklingar með þroskaskerðingu komu fram á sýningu í Osló og olli hún afgerandi hugarfarsbreytingu sýningargesta. Áfram var haldið næstu árin, hljómsveitirnar urðu fleiri og fjölbreyttari og danshópar og kórar bættust við. Í dag eru um 800 meðlimir í Dissimilis í Noregi og um 2500 í öðrum löndum.
Fyrir ári síðan sýndi hópurinn óperuna „Jenny, en annerledes opera“ í nýju Norsku óperunni í Osló við frábærar undirtektir og nú eru þau komin til Íslands og sýna okkur verkið Árstíðirnar fjórar.

Leikstjóri og Danshöfundur: Kari Beth Thørrisen.
Píanóleikari: Tatiana Fokina.
Leikarar: Alexander Stangeby Paulsen, Elin Hellesvik, Else-Mari Andreassen, Emilie Grenan, Gry-Lillian Nilsen, Jon Bjørlykke, Kasper Blaauw Johansen, Kjetil Ringen, Markus Lie Tønnesen, Philip Willoch Syse, Mathias Hernes, Mari Hegdal, Marie Underland Mjelva, Saga Haugland, Solveig Aksnes, Solveig Aaland, Stein Kristiffersen, Stian Mørk, Thea Berg Dønås, Thor-Arne Korsell, Trine Kramås og Ådne Klungseth.

 

Dissimilis verða ekki ein um stóra svið Borgarleikhússins, því eftirtaldir hópar munu einnig stíga á sviðið:

 

Hjólastólasveitin.

Þann 11. janúar 2008 varð Hjólastólasveitin formlega til en hún er sprottin upp af námskeiði hjá Halaleikhópnum haustið 2007. Tilgangur félagsins er að skemmta fólki með uppistandi víðs vegar, innanlands sem utan, vekja athygli á málefnum hreyfihamlaðra og annarra fatlaðra í samfélaginu og efla heilsu allra landsmanna með hlátri. Á þeim tveim árum sem Hjólastólasveitin hefur starfað hefur hún komið fram í 21 skipti vítt og breitt um landið. Ljóst er að þetta framtak er algjör nýlunda og frumkvöðlastarfsemi sem sveitin er að framkvæma um þessar mundir.

Hjólastólasveitina skipa: Ágústa Skúladóttir, Ása Hildur Guðjónsdóttir, Guðríður Ólafsdóttir, Kolbrún Dögg Kristjánsdótti, Leifur Leifsson og Örn Sigurðsson.

 

Tjarnarleikhópurinn.

Tjarnarleikhópurinn samanstendur af ungu og spræku fólki sem á það sameiginlegt að hafa brennandi áhuga á leiklist og flestu menningartengdu. Leikararnir stunduðu allir leiklistarnám í framhaldsskóla og stofnuðu formlega Tjarnarleikhópinn þegar framhaldsskóla lauk.

Hópurinn hefur verið starfandi um nokkurra ára skeið og gert víðreist með sýningar sínar, sýnt innalands og erlendis en hópurinn sýndi verkið "Okkar eigin Shakespeare" í Danmörku fyrir tveimur árum við góðar undirtektir. Í hópnum er einnig liðtækt myndlistar- og tónlistarfólk og rithöfundar sem hafa lagt hópnum til handrit þótt flestar sýningar sínar vinni hópurinn í spunavinnu.

Tjarnarleikhópurinn mun flytja verkið Hótel Hrollstaðir. „Það er ekki fyrir alla að gista á hótel Hrollsstöðum – myndir þú þora?“

Leikarar:  Andri Freyr Hilmarsson, Arnbjörg Magnea Jónsdóttir, Auðun Gunnarsson, Ástrós Yngvadóttir,

Bjarki Erlingsson, Edda Sighvatsdóttir, Elín Ólafsdóttir, Gísli Björnsson, Guðmundur Stefán Guðmundsson, Hildur Sigurðardóttir, Halldóra Jónsdóttir, Halldór Steinn Halldórsson, Íris Björk Sveinsdóttir, Rut Ottósdóttir og Sigurgeir Sigmundsson.

Kennarar:  Anna Brynja Baldursdóttir, Guðlaug María Bjarnadóttir og Guðný María Jónsdóttir.

 

Ég og vinir mínir.

Húmanímal var frumsýnt í apríl 2009 og fékk frábærar viðtökur gagnrýnenda og áhorfenda. Hún hlaut 9 grímutilnefningar og var nýlega sýnd á Lókal leiklistarhátíðinni. Húmanímal er fyrsta samvinnuverkefni hópsins Ég og vinir mínir. Sýningin var unnin í spuna þar sem meðlimir hópsins deildu ástríðum sínum, löngunum, upplifunum og rannsóknum.

Í Húmanímal var fókuspunkturinn settur á mannlega hegðun. Hvatalíf mannsins, langanir, þrár og firring var meðal annars til umfjöllunar. Það má segja að mannskepnan hafi verið krufin til mergjar. Hvernig þróaðist þessi skrítna dýrategund? Hverjir eru siðir hennar? Hverjar eru langanir hennar og hvað gerist þegar hún sleppir fram af sér beislinu?

Leikstjórar:  Friðrik Friðriksson og Friðgeir Einarsson.

Búningar og leikmynd: Rósa Hrund Kristjánsdóttir.

Tónlist:  Gísli Galdur Þorgeirsson.
Leikarar:  Álfrún Helga Örnóflsdóttir, Dóra Jóhannsdóttir, Margrét Bjarnadóttir, Saga Sigurðardóttir, Jörundur Ragnarsson og Friðgeir Einarsson.

 

Frítt er á Leiksýninguna, en þeir sem vilja tryggja sér sæti er bent á að hafa samband við Þroskahjálp í síma 588-9390 eða netfang: [e-mail]

Skrár tengdar þessari bloggfærslu:

• Dissimilis

SKRÁNING Í LEIKHÚS

Skráning í Leikhúsveislu:

 [e-mail] og í síma: 588-9390

Skráning á ráðstefnu

 

Til þess að skrá sig á ráðstefnu

Skráning:

http://www.eventure-online.com/eventure/welcome.do?type=participant&congress=69_9028&page=index

 

 Til þess að skrá sig eingöngu í leikhús:

 Sendið póst á: [e-mail] eða hringið í síma 588-9390

 

 

 

28 dagar

Nú eru 28 dagar í áhugaverða ráðstefnu og stórbrotna leiksýningu.

List án landamæra hvetur ykkur til að skrá ykkur sem fyrst.

Saga er ein af leikurunum hjá Dissimilis

Tengill á skráningu á ráðstefnu og á leiksýningu / Conference and Theater

Skráning / Registration:
http://www.eventure-online.com/eventure/welcome.do?type=participant&congress=69_9028&page=index

Life and Art WithOut Boundaries

Conference 28.09.2009 - See attached file

Skrár tengdar þessari bloggfærslu:

• Life and Art Without Boundaries - Conference

Líf og list án landamæra 28.september

Líf og list án landamæra
Sýnileiki, réttindi og þátttaka  

NORRÆN RÁÐSTEFNA
28. september 2009 

Ráðstefnan er haldin á vegum Listar án landamæra, sem er árlegur viðburður þar  sem lögð er áhersla á samvinnu fatlaðra og almennings í gegnum listir og menningarstarf, í þeim tilgangi að efla vitund og skilning á milli einstaklinga sem búa að ólíkri getu til athafna, til hagsbóta fyrir samfélagið í heild.   

Aðstandendur Listar án landamæra eru Landssamtökin Þroskahjálp, Öryrkjabandalag Íslands, Fjölmennt, Átak félag fólks með þroskahömlun og Hitt húsið. 

Ráðstefnan er skipulögð í samráði við Norrænu nefndina um málefni fatlaðra, menntamálaráðuneytið, og með stuðningi Norrænu ráðherranefndarinnar og Norræna menningarsjóðsins. Ráðstefnan er hluti af dagskrá formennskuáætlunar Íslands, sem gegnir formennsku í norrænu ráðherranefndinni árið 2009. 

Á ráðstefnunni verður m.a fjallað um: 
·         Sýnileika og kynningu fatlaðra í fjölmiðlum og menningu í norrænum löndum.
·         Mikilvægi 30. greinar samnings Sameinuðu þjóðanna um réttindi fatlaðs fólks (Þátttaka í menningarlífi, tómstunda-, frístunda- og íþróttastarfi).
·         Gildi Listar án landamæra og annarrar menningarstarfsemi fatlaðra sem fyrirmynda fyrir grasrótar-hreyfingar og þátttöku fatlaðra í listum og menningarstarfi, sem hægt væri að nýta svæðisbundið eða á landsvísu í öðrum norrænum löndum.  


Ráðstefnan fer fram á Grand Hótel í Reykjavík 28. september 2009. 

Ráðstefnan er opin almenningi og allir eru velkomnir en ætti  sérstaklega að höfða til samtaka fatlaðra á Norðurlöndunum, fræðimanna, þeirra er vinna að málefnum fatlaðra og stjórnenda á sviði lista- og menningarmála.

 Ekkert þátttökugjald er á ráðstefnunni, en þátttakendur þurfa að skrá sig. Það má gera með því að slá inn þessa slóð hér fyrir
neðan. Í skráningunni má einnig skrá sig í hádegismat og á leiksýningu Dissimilis í Borgarleikhúsinu.

Skráning:
http://www.eventure-online.com/eventure/welcome.do?type=participant&congress=69_9028&page=index

Sjá dagskrá í viðhengi tengt þessari færslu  

 

 

Skrár tengdar þessari bloggfærslu:

• Líf og List án landamæra
• Life and Art Without Boundaries - Conference